សារព័ត៌មាន រស្មីឧត្តរ

ព័ត៏មានជាតិថ្មីៗ

ថ្ងៃទី ៖

13-02-2024, ដោយ Admin | 54 Views

ខេត្តបន្ទាយមានជ័យ៖ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ចាប់ពីថ្ងៃទី៦ ដល់ថ្ងៃ៩ ខែកុម្ភៈ ឆ្នាំ២០២៤

ឯកឧត្តមវេជ្ជបណ្ឌិត នាង ភារិទ្ធ រដ្ឋលេខាធិការក្រសួងសុខាភិបាល និងជាក្រុមការងារទទួលបន្ទុកជួយពង្រឹងគុណភាពសេវាមណ្ឌលសុខភាព នៅក្នុងខេត្តចំនួន ៦ ( កំពង់ចាម កំពង់ធំ សៀមរាប បន្ទាយមានជ័យ ឧត្តរមានជ័យ ព្រះវិហារ )

អមដំណើរជាមួយលោកជំទាវវេជ្ជបណ្ឌិត ចាន់ សុខា អនុរដ្ឋលេខាធិការក្រសួងសុខាភិបាល សមាជិកក្រុមការងារទទួលជួយខេត្តបន្ទាយមានជ័យ សៀមរាប បានអញ្ជើញចុះពិនិត្យមណ្ឌលចំនួន ៩កន្លែង និងប៉ុស្តិ៍សុខភាព ១កន្លែង នៅខេត្តបន្ទាយមានជ័យ។

គោលបំណងនៃការចុះពិនិត្យនេះ គឺដើម្បីពិនិត្យ និងជំរុញការអនុវត្តតាមសៀវភៅស្តង់ដា នៃការទទួលស្គាល់គុណភាពសេវាមណ្ឌលសុខភាព នៃព្រះរាជាណាចក្រកម្ពុជា និងផ្តោតទៅលើចំណុចសំខាន់ៗមួយចំនួន៖

១- ហេដ្ឋារចនាសម្ព័ន្ធបរិស្ថានក្នុង និងជុំវិញមណ្ឌល

២- ការលើកកម្ពស់គុណភាព សុវត្ថិភាពអ្នកជំងឺ

៣- ការបដិសណ្ឋារកិច្ចក្នុងការផ្តល់សេវាថែទាំដល់អ្នកជំងឺ

៤- ការគ្រប់គ្រង និងការអភិវឌ្ឍន៍ធនធានមនុស្ស

៥- ការបណ្តុះបណ្តាលបន្ថែមលើបច្ចេកទេស និងប្រព័ន្ធឌីជីថល

៦- ការគ្រប់គ្រងឱសថ និងឧបករណ៍បរិក្ខារពេទ្យ

៧- ការបំពេញការងារ និងប្រចាំការ២៤ម៉ោង/៧ថ្ងៃ។

សូមបញ្ជាក់ផងដែរ ការចុះពិនិត្យនោះក៏មានការចូលរួម សម្របសម្រួលពី អនុប្រធានមន្ទីរសុខាភិបាលខេត្ត អនុប្រធានការិយាល័យមន្ទីរសុខាភិបាលខេត្ត ព្រមទាំងមន្ត្រីបច្ចេកទេសមួយចំនួនផងដែរ ដោយបានចុះទៅដល់មណ្ឌលសុខភាពចំនួន៩ រួមមាន៖

១- មណ្ឌលសុខភាព ប្រាសាទ

២- មណ្ឌលសុខភាព ទឹកជោរ

៣- មណ្ឌលសុខភាព ភ្នំលៀប

៤- មណ្ឌលសុខភាព រហាល

៥- មណ្ឌលសុខភាព ឈ្នួរមានជ័យ

៦- មណ្ឌលសុខភាព បុស្បូវ និងប៉ុស្តិ៍សុខភាព ខ្ទាស់

៧- មណ្ឌលសុខភាព បត់ត្រង់

៨- មណ្ឌលសុខភាព ឫស្សីក្រោក២ និង

៩- មណ្ឌលសុខភាព ភ្នំតូច។