| ថ្ងៃទី ៖ | 07-11-2024, ដោយ Admin | 27 Views |
អង្គភាពប្រឆាំងអំពើពុករលួយឃាត់ខ្លួនមន្ត្រីសាលាខេត្តតាកែវ ចំនួន ៣នាក់
អង្គភាពប្រឆាំងអំពើពុករលួយបានឃាត់ខ្លួនមន្ត្រីសាលាខេត្តតាកែវ ពាក់ព័ន្ធករណីរំលោភអំណាច និងការប្រពឹត្តិមិនត្រឹមត្រូវក្នុងដំណើរការលទ្ធកម្មសាធារណៈ ព្រមទាំងបទល្មើសនៃការលាងសម្អាតប្រាក់ និងរំលោភអំណាច និងបានបញ្ជូនទៅសាលាដំបូងខេត្តតាកែវ ដើម្បីចាត់ការតាម នីតិវិធី។
មន្ត្រីសាលាខេត្តតាកែវ ទាំងបីរូប ត្រូវបានអង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី ០៥ ខែវិច្ឆិកា ឆ្នាំ២០២៤។
លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយបានប្រាប់វិទ្យុបាយ័នថា : នៅថ្ងៃទី៧ ខែវិច្ឆិកា នេះ អង្គភាពប្រឆាំងអំពើពុករលួយបានបញ្ជូនសំណុំរឿងមួយករណី ដែលមានជនសង្ស័យបីរូប ទៅសាលាដំបូងខេត្តតាកែវ អ្នកទាំងបីមានឈ្មោះ៖
១) ហេង វុទ្ធី មានតួនាទីជានាយកទីចាត់ការផែនការ និងវិនិយោគ សាលាខេត្តតាកែវ ភេទប្រុស អាយុ ៤៥ ឆ្នាំ
២) ម៉ម វិចិត្រ មានតួនាទី អនុប្រធានការិយាល័យគាំទ្រមូលដ្ឋាន អាយុ ៣៩ ឆ្នាំ
អ្នកទាំងពីរជាប់សង្ស័យ ក្នុងបទល្មើស រំលោភអំណាច និងការប្រពឹត្តិមិនត្រឹមត្រូវក្នុងដំណើរការលទ្ធកម្មសាធារណៈ ព្រមទាំងបទល្មើសនៃការលាងសម្អាតប្រាក់។
៣) ដោយឡែក យ៉ុន សុធន មន្រ្តីការិយាល័យគាំទ្រមូលដ្ឋាន អាយុ ៤៩ ឆ្នាំ
ជាប់សង្ស័យក្នុងបទល្មើសរំលោភអំណាច និងការប្រពឹត្តិមិនត្រឹមត្រូវក្នុងដំណើរការលទ្ធកម្មសាធារណៈ។
|